15 Settembre, 2002
A i carabiniéer ga vòi bèen (Elide Paternieri Polenghi)
Mé, ( 'sa gh'oi da dìi...?) a i carabiniéer ga vói bèen...Sarà perchè i gh'àa 'na divìiza e j è suldàat de la Madre Patria...

A i carabiniéer ga vòi bèen

Mé, ( 'sa gh'oi da dìi...?)
a i carabiniéer ga vói bèen...
Sarà perchè i gh'àa 'na divìiza
e j è suldàat de la Madre Patria...
sarà perchè da jöön
la memòoria la m'è tàant càara...;
sarà - e àanca quèst l'è trìst e véerch' ògni
pòoch séenti dìi
che 'n quaidöön de lùur
l'à pèers la vìta per al sóo duéer...
ma mé a i carabiniéer
ga vói pròpia bèen!
S'j incùntri par la stràada
e i véen sö per dùu
( da chì indrée cun mantéla e lùcèrna
i 'm parìiva rundàane ca fàalca
pr'al céel in d'i tramùunt da primavéera)
s'j incùuntri par la stràada
- tùurni a dìi -
ma séenti slargàa el cóor...
e - s'i füs mìia de perlüstrasiòon ga
strenzarés la màan
perchè i sèenta la mé amicìsia
e i bazarès in frùunt
perchè i me sènta màma e suréla:
màma d'i só òorfen
e suréla da chì - in gramés a crìida
sènsa pö làagrimi
chi pö na tùurna indrée...
Vurès... óoh vurès pudìi ezaltàa
cun paròoli sàanti
chi dà la vìta pèr la giüstìsia,
per stripàa li màli èerbi
che - tàame la zizàania crès
in méza a tàanta bùna zèent!
Vurès pudìi dìi a l'Itàlia töta:
Vuròmech püsèe bèen a 'sti fióói,
che ne jöta a salvàa ch'la grasia
che Dìo 'l à dàt a l'òm
quèla che sóta al nòoster cèel
e a 'l triculùur pudóm
amò ciamàa libertà.

Elide Paternieri Polenghi