15 Settembre, 2002
Giovanni Chiappani: Libertà de parola
Alùura… ‘nduéela la libertà de paròola?

Giovanni Chiappani: Libertà de parola
Alùura… ‘nduéela la libertà de paròola?
Libertà de parola
La libertà de paròola el gh’àares de éser en dirìto che ‘l òm
el gh’àa sèemper de üzàa e de difèender. Invéce, de spès, büzügna
che te tàaza.
Quàan te séet en pütél e te sèentet chèi gràant a ciciaràa te
vóot puciàaghe dèenter el nàas, ma tóo màader la te ricòorda
sèemper che büzügna fàa cìto.
… te sèet ubligàat a tàazer.
De regasòt te cumìincet a capìi ‘l vìiver de’l móont. In cà (e
àanca fóora) te vóot fa sèenter el tó paréer; ma chéi püsèe gràant
de te i céerca de stupàate la bùca.
… i te fa tàazer.
Quàan te vèet suldàat, sa te rebèchet a’n quàal gradüàat el te
sgnàca in sö ‘l atèenti ‘npàlàat e sa te véen vója de insistèer
gh’è la prezòon che te spéta.
… ‘l è mèei tàazer.
De spuzàat se fà sèemper quàai bravàade cun la mujéer, per i fióoi,
el mestéer, i sòolt che j è màai a bàasta e àan per àaltre ròobe.
Ma quàan te dìizet na paròola de pö la te ricòorda le gentilése che
te gh’ìivet da murùus e le prumése che te gh’èet fàt quàante séet
spuzàat.
… te tùca tàazer.
In sö’l lauràa tàante vòolte te véen vója de dìighen quàter a chèi
che stà püsèe in àalt de te, ma apèena te fèet la próova te capìset
che na paròola de pö la póol véegner a tóo dàan; te séet sèemper
indecìis se parlàa o tàazer de lé.
... e te cunviéen tàazer.
Quàan te séet en genitùur cui fióoi gràant, te pèenset de vìighe amò
vergóta da insegnàaghe, ma lùur i te dà uciàade de cunpatimèent per
fàate capìi che te ghe insegnèet pö nièent.
… te véen vója de tàazer.
Alùura… ‘nduéela la libertà de paròola?