15 Settembre, 2002
Vàca de làt di Giovanni Chiappani
Té, vàca, in India te sèet sàcra,ma àan a Cremùna, sa te fèet tàant làt,i te téen bùna.

Vàca de làt di Giovanni Chiappani
Té, vàca, in India te sèet sàcra,ma àan a Cremùna, sa te fèet tàant làt,i te téen bùna.

Té, vàca,
in India te sèet sàcra,
ma àan a Cremùna,
sa te fèet tàant làt,
i te téen bùna.

Apèena nàada, té, fémina,
i te fà crèser,
e i te cüüra ‘me ‘n pütél,
a diferèensa d’i tòo fradéi màs’c
che ja ingràsa per el macél.

Prèst te divèentet en manzòol
e i tòo padròon
i te tràta cùma i pòol:
in de’n bàrech
didrée a l’èera
o sóta ‘n pòortech,
i te dà da mangiàa
de la pàja, sìme e scartòs,
e quàan la va bèen
l’èerba d’i fòs.

Rivàada a l’età giöösta
sa i te spùuza cun el tòor
ciàmete fürtünàada,
perchè la «pruéta»
la véen sèemper püsèe dupràada.

Quàan te divèentet màma,
vetrinari, padròon e bergamìin
i decìit cùusa dàate da mangiàa,
e mìia per fàate stàa bèen,
ma per el làt che te gh’èet da fàa.

Se po’ te divèentet
na latìfera che vóol de’l vó,
de préemi e de bèen ghe n’è de pö:
per té gh’è i püsèe bòon bucòon,
s’intèent de fèen o de pastòon;
i te pòorta ‘n sö le féere
e te sfìilet dinàans a gèent
che se n’intèent;
i te rimìira e i te pàalpa
i fiàanch, le tète, la téesta
e sa te vìincet i te fa féesta,
i te mèet d’i nastrìin in s’i còorni
de divèers culùr,
medàje el còl, ghirlàande de fiùur.

Però, atèenta
a fàate mìia végner el fredùur,
e supratöt a fàatel mìia düràa…!
tè te sèet na vàca
e sèemper tàant làt te gh’èet da fàa!
Sultàant per el làt
te séet la regìna de la casìna;
sa te càlet de làt
te vàalet negòt:
i te mèena sübit da’l bechèer
e te finìset la tóo vìta
in s’i nòst fugulèer!