15 Settembre, 2002
El cumàant de’l fatùur di Giovanni Chiappani
Questa composizione è riferita alla vita in cascina nel passato

El cumàant de’l fatùur di Giovanni Chiappani
Questa composizione è riferita alla vita in cascina nel passato
El cumàant de’l fatùur
(parodia)

J òm ‘ndìiva sóta ‘l pòortech
sübit dòpo vìighe disnàat;
quàidöön i se metìiva sedìit,
quài àalter j éera cuciàat:
i spetàava ‘l fatùur a cumandàa
i mestéer ch’i gh’ìiva de fàa.
Per el cumàant de’l mesdé
el fatùur près-a-pòoch el dizìiva cuzé:

Vó Rósi, tachèe i cavàai,
endèe a tóo ‘l fèen
in de ‘l càanp d’i quài .

Té, Màagher, e àan té, Pantéera,
endèeghe adrée
e me racumàandi :
carghèe in tèera!

Tè, Nìin, tàca la rastéla,
te ghe vèet dinàans,
te fèet dò téere
in se més càanp.
Quàan te gh’èet finìit,
didrèe de’l càr te pìrlet zó ;
chèl che rèesta te ‘l càtet sö.

Vó, Càapra, insèma a Peléegher,
cu ‘i bóo e ‘l aràat
endèe a aràa ‘l canpìin;
‘l è ‘n cudegòt che arùm
per sumenàaghe ‘l quaratìin.

Secùunt…, vó endèe avàanti
cu ’l mestéer de stamatìina;
quàan rivèe in fòont
se vàansa ‘l tèenp,
sgürèe ‘l fòs de la Bredìna .

Té, Bìgio, tàca la màchina de segàa
l’èerba de le vàche,
in de ‘l Linghiròon
te vèet a fàa.
Cumìincia in custèera
vezèen a la mùja,
e quàan te la mèenet a cà,
slàrghela sóta ‘l pòortech
per inpedìi che la bùja.

Tè, Giàalt, insèma a Cerüüt
endèe a dàa ‘l càanbi
a Tilièt e a Cècu Vìla:
casèe sö ‘l rüüt da la pìla.

Vó, Tilièt, tachèe ‘l marenòon de ‘l pìs,
vudèe la büüza de ‘l stalèt
e pò straminèel in de ‘l Canpèt .

Cècu Vìla, cun e fèr véc
endèe a segàa i sgalbàs
adrée a ‘l fòs de ‘l Canpàs .
Quàan si rivàat a ‘l stuadél
vegnìi a cà,
endèe da la padrùna
per el sòlit picanél.

Tè, Bìinda, insèma a ‘l Risòol,
Murèt e Didòon,
cu ‘l fèr de segàa
endèe a tajàa de fàa fèen
in de ‘l càanp de ‘l Ciapòon .
In pö de ‘l cudèer e de la préeda
tudìi sö la martelìna.
Quàant el fèr el tàja pö,
ghe dèe na batidìna.

Tè, Carlòon, te tachèt el tumarél,
te vèet a tóo l’èerba
per i cavài in de ‘l Penél .
Tóo sö ‘l bròch,
làsa ‘l bài a la padrùna
che la gh’àa de ‘ndàa
cun la caròosa a Cremùna.

Dòon, vuàaltre dóne
ve armèe de bàch e bùna vója,
endèe a sbachetàa ‘l fèen
in de la Ciàpa de la mùja.
Me racumàandi :
ciciarèe pòoch,
fèe mìia tàant sàm,
se ve sèent el padròon
‘l è vòoster dàn.
Na bèla fióola
la va vezéen a ‘l fatùur
e sut-vùus la ghe dìis:
“Nisöön cumàant per mé?”
- Véa didrée de la geluzìa
che cercùm insèma l’armunìa! -