15 Settembre, 2002
Me ralegri (di Giovanni Lonati)
*Rallegramenti* all’amico Aristide Cavalli (nella foto), fondatore della Cavalli & Poli
Ciél che g’araf mai dìtt, trent’àn indree
quand te sgoubàvet da matìna a sera,
e te studiàavet gieusta la manera,
tra i tanti vèent cuntrari, de stàa in pee;
quand te gh’ée avèert chell miser boutighin,
coun chei pochi librètt senza scanzìa,
e in mezz a sta magra poüesìa,
l’apetit el te fava spizighin;
chi mai te gh’araf prougnousticat
“cavaliere del lavoro” nientemen?!
- J’è schèrz, j’è misteri del desten -
diraf quei che mai t’àa praticat.
Ma invece no: se a ste mond gh’è ‘n titol
che al too noumm possa staa bèn in par,
l’è pròpia quest, perché ‘l te mètt in ciar
perché ‘l dìis la too vìta in de ‘n capitol!
E, per ver, te n’ èe fatt del trabatàa!
e dé e nòtt, e feste e teutti i dé…
oh, chiél che g’ àa fatt pussèe de te
che mai l’è counouscit el ripousaa?!
In cènt prougètt grandious e picoulen
te gh’èe studiat, te gh’èe limat l’inzègn;
e, in de ‘l mar de l’industria del lègn,
te see riuscit a fabricàa i viouleen!
L’ è quest l’insonni too, l’aspirazion:
scouprìi ‘l segret de Amati e Stradivar!
e,quel che al to cor restaraf pu car,
tournàa Cremouna in tanta stimaziòn!
Materia e omm te gh’ èe vourit studiaa,
coume studia ‘l terèn l’ agricoltour,
coun la fede che a furia de sudour
da teutt en frutt s’ àa da poudìi cavàa.
Oh, quanti, dal too esempi, se i voulèss
i poudaraf intèn der e imparàa
e render sold e ounour a la citàa!
Tant biseugn che la na sènt adèss!
Intant, col “meralegri” al cavalier,
me foo l’augùri che in Italia almen
de sta scielta qualità de citaden
se ‘n trova qualchedeun ogni mester.
Eviva dònch l’amich! ste bell’ounour,
me ‘l crèdi pròpia n’ incouragiamènt
a quei ch’ àa douperat e brazz e mènt
… senza faa mai mercat del soo coulour.
 
|