15 Settembre, 2002
Giovanni Chiappani: Na bùumba nèta
Composizione in difesa della pace
Giovanni Chiappani: Na bùumba nèta
Composizione in difesa della pace
Na bùumba nèta
I gh’à ‘nventàat na bùumba nóoa
ma gh’um töti de ‘ngüràase
ch’i la méta màai ‘n próova.
I la ciàma bùumba néta
da sganciàa de sa e de là
quàan nisöön i se la spéta.
Quàidöön i pèensa de dupràala
in de na guèra de teàter
ma, a ch’ilùur, véen sübit
vója de dìighen quàter
Dùa la càasca töt la màsa,
rèesta ‘n pée sultàant i müür
– sa jè fàat cun ‘l cemèent –
perchè sünò, àan lùur,
i se sbrizùla ‘n dè ‘n mumèent
La sarà néta fin ch’i vóol
ma a pensàaghe ‘n brìis apèena
crès el frèt in de la schèena:
jè tròp i disàaster che la prücüüra
a la vita de töti, a la natüüra
I dìis che atùurno a’l pòst
dùa véen casàat la bùumba
rèesta töt sèch, na tùumba;
e chèi che stà püsèe luntàan
i crépa dopo ‘n pòo, piàan piàan
in de ‘n agunìia tàant tremèenda
che cunviéen pensàaghe gnàan
Om, béesti, uséi, insèt
in de ‘n àtim i sparìs
l’è na bùumba che rustìs;
le piàante, ‘l èerba, i fiùur
töt brüzàat, sparìit àn lùur!
Alùura véen da dumandàase,
cun la téesta ‘n de le màan:
« Ma che móont gh’arùm dumàan? »
« Da i müür che réesta,
sèensa vita per nisöön
nasaràai amò quàidöön? »
« Pütòst de spèender tàanti sòolt
in urdègn che fà d’i mòort,
distrüsiòon, en màar de dàn,
el mìia mèi spendìi
per jütàa chèi che móor de fàm? »
‘Lùm da fàa stè riflesiòon,
an perché le bùumbe atòmiche
néte, o spùurche cùma jéera,
le tràta töti a na manéera.
Nisöön póol fàa ‘l fürbìin:
de ‘n uperàari o de ‘n laüreàat,
de ‘n siùr o de ‘n puarèt
‘lè precìis de töti el só destìin ;
americàan o rùsi,
inglées o italiàan,
tudèesch, asiatich o africàan,
òm e dóne,
rùs o biàanch,
bòon o catìif,
cun la guèra atòmica
bèen pòochi ‘n rèesta vìif!
Intàant che suntùm in tèmp amò
disùm a i càp de le nasiòon:
« Fèe de töt per salvàa ‘l móont
da ‘n urèenda distrüsiòon!
Duprèe le risùurse dè ‘l creàat
per el prugrès e per la pàas!
I rasanàai dùa gh’è dèent le bùumbe vudèei,
fèeghe dèenter d’i granèer,
o d’i giardéen cun piàante e fiùur,
dùa fàa giugàa e stimàa i pütéi
farìi cuntèent àan i genitùur
e vedarìi che piàan pianéen
farùm ‘n móont de bòon fradéi. »
 
|